បាត់ដំបង៖ ប្រជានេសាទតំបន់ដែនទឹកក្នុងស្រុកឯកភ្នំ ខេត្តបាត់ដំបង ចាប់ផ្ដើមធ្វើប្រហុកត្រីកំភ្លាញដើម្បីរកប្រាក់ចំណូលផ្គត់ផ្គង់គ្រួសារ។

ពលរដ្ឋរស់នៅឃុំកោះជីវាំង ស្រុកឯកភ្នំ នៃខេត្តបាត់ដំបង អ្នកស្រី ព្រាប ផុន អាយុ៦៥ឆ្នាំ បានឲ្យដឹងថា ការងារធ្វើត្រីប្រហុកជាការងារដែលអ្នកស្រីធ្វើបន្ទាប់ពីការងារនេសាទត្រី។ អ្នកស្រីថា ការកែច្នៃធ្វើប្រហុកប្រភេទត្រីកំភ្លាញបន្ថែមជារបរមួយដែលក្រុមគ្រួសាររបស់អ្នកស្រីបានធ្វើរយ:ពេលជាង ៣០ឆ្នាំមកហើយ។

អ្នកស្រីបន្តថា តម្រូវការប្រហុកត្រីកំភ្លាញធម្មជាតិមកដល់ពេលនេះនៅតែមានការពេញនិយមសម្រាប់ប្រជាពលរដ្ឋទទួលទាន ហើយទីផ្សារល្អដែលធ្វើឱ្យប្រាក់ចំណូលពីការកែច្នៃប្រហុកនិងត្រីឆ្អើរនេះមួយរដូវដែលមានរយ:ពេល០៣ទទួលបានពី៣លានរៀលឬច្រើនជាងនេះ ដែលអាចជួយលើកស្ទួយជីវភាពគ្រួសារបានសមរម្យ និងផ្គត់ផ្គង់ការសិក្សារៀនសូត្ររបស់កូនចៅបាន។

ប្រជានេសាទម្នាក់ទៀតអ្នកស្រី តុន គឹមហោ បានឲ្យដឹងដែរថា ប្រហុកត្រីកំភ្លាញបច្ចុប្បន្នលក់បានក្នុងតម្លៃមួយគីឡូក្រាមចាប់ពី ៦០០០-៧០០០រៀល។ អ្នកស្រីថា បើទោះបីការងារនេះមានការនឿយហត់តែបានជួយលើកកម្ពស់គ្រួសារបានមួយកម្រិតពីមួយរដូវទៅមួយរដូវ។

មេឃុំកោះជីវាំង ស្រុកឯកភ្នំ នៃខេត្តបាត់ដំបង លោក ពុំ ចិន បានឲ្យដឹងដែរថា លោកសប្បាយចិត្តពេលដែលបានឃើញប្រជានេសាទឧស្សាហ៍ព្យាយាមនាំគ្នាប្រកបរបរធ្វើប្រហុកត្រីកំភ្លាញដែលជាប្រភេទត្រីតូចៗមិនបំពានបំរាមផ្លូវច្បាប់ ម៉្យាងទៀតបានលើកកម្ពស់សេដ្ឋកិច្ចគ្រួសារបានល្អប្រសើរមិនប្រឈមនឹងការខ្វះខាត៕